|
Nako e bethile iri ya lesome pedi mosegareng wa kgalela ,ge badudi ba eme tseleng go kgelela meetse ka dikiribane le dikupho.Methaladi ye metelele e dirilwe ke dikupho dipomping tše malwa .Badudi ba motse wa Kalkspruit,Ga-Maraba ka Ward 11, ba kgelela meetse ka bontši le go a malapiša eng a bona.Le ge badudi ba be ba thabetše go tšwa ga meetse ao,ba ile ba tšweletša maikutlo a bona ka mathata ao ba itemogelang ona a hlokege ya meetse.Bona ba boletše gore meetse a tšwa morago ga nako ye telele dipomping tša bona,nakong tše dingwe morago ga beke tše pedi.Ba tšwetše pele ka gore nako ye ge meetse a fedile,ba swanelwa ke go reka ka ranta tše pedi ka metseng yeo ba epilego meetse.
Masepala wa selegae wa Aganang o abelwa ditirelo tša meetse ke masepala wa selete wa Capricorn,gomme mathata a hlokego ya meetse ke hloba boroko nageng ka bophara.Mmušo o leka ka mešigo fela go iša ditirelo go batho kudu ba dinaga magaeng bjale ka dintlo ,mohlagase,ditsela ,tša maphelo le meetse.Nakong tše dingwe meetse a hlokega bathong ka tswenyo ya maloko a setšhaba le go thunya a diphaepe.
Le ge bontši bja badudi ba Kalkspruit ba laeditše go se kgotsofale ka ditirelo tšeo mmušo le masepala o ba abelago tsona,O mongwe wa badudi o ile a fapana le seo.Yena o boletše gore masepala wa Aganang o ba kgotsofatša ka tše dingwe bjale ka dikontiri ditseleng le matamo a meetse a okeditšwe maatla."Ke ile ka ya kopanong ya masepala wa Aganang ,gola One-Stop Centre.Ke kgonne go bona gore mmušo o hloletše bana ba bo rena mešomo ka lenaneo la CWP,sekontiri bare diretše,efela ge e le kabong ya dintlo tša RDP,mmušo o sepela boka legobu",a realo modudi wa Kalkspruit.
O mongwe wa badudi Daniel Maraba o hlalosa mabaka ao a dirago gore motse wa bona o hloke meetse ka tsela ya maleba bjale ka go ikgogela ntle le molao ke badudi .Maraba o kgopetše masepala le mmušo go abela badudi meetse ka moka ka ge batsofe ba palelwe ke go sepela leeto le letelele go kga meetse ka dikiribane.Yena o tswetše pele ka gore khoneng ye ngwe le ye ngwe gobe le pompi ya meetse le go maatlafatšsa mananeo a tša mafarahlahla a meetse go imolla setšhaba.
Tonakgolo ya Limpopo Cassel Mathale nakong ya ge a efa polelo go badudi ba Ga-Maraba o boletše gore mahumo a batho a šomišetšwe ka tsela yeo a sa tšwelego setšhaba mohola le go fediša bodidi le tlala bathong.Yena o tšwetše pele ka gore le ge tlala le hlokeg ya mešomo ka Afrika Borwa,ele pharela ya thaba,badudi ba swanetše go swarana ka matsogo goba ngatana ye tee.Mathale o boletše gore bontši bja batho ka dinaga magaeng bo sa tšwela pele go fiwa meetse ka ditanka le go hloka ditsela tša maleba.
Tonakgolo Mathale o dirile boipiletšo go Makgoši go tlemaganya le mmušo nepekgolo ele go imolla tlala maphelong a batho."Baetapele ba setšo ba swanetše go tseba ka lenaneo la bosetšhaba leo le nyakago go bona badudi batsea karolo mererong ya mmušo ",a realo Mathale.Yena o rumile ka gore mmušo lekile go maatlafatša maphelo a badudi gomme o sa tlo tšwela pele kago abela ditšhaba ditirelo tša motheo.
Khansele ya masepala wa Aganang e amogetše mmušo tokomane ya lenaneotlhabollo la ditekanyetšo tša ngwaga wa 2013/14.Mohlomphegi Meyara,Cllr Maria Mokobodi o adile mašeleng a go lekana R131 895 448.95,yeo e beakantšwego go aba ditirelo go badudi ba masepala ngwageng o moswa wa ditšhelete.Meyera Mokobodi o laeditše gore masepala o beetše thoko tshelete ya go lekana R48 million kabong ya ditirelo tša meetse."Re tlo thušana le masepala wa selete wa Capricorn go dira diprojeke tsa meetse go lwantšana le hlobaelo ya meetse nageng ya rena.Mopresidente wa naga Jacob Zuma o laeditše maloba ge a efa polelo ka seemo sa naga sa hlokego ya meetse gore go beilwe thoko mašeleng a go bonagala go goga meetse go tloga letamong la De Hoop,gola Sekhukhune nepekgolo e le go thusa dilete tša Capricorn,Waterberg le tše dingwe",a realo Meyara Mokobodi.Yena o rumile ka gore masepala o tla aba "bulk water" gomme se se tlo thusa ka letseno ka ge badudi ba tlo lefela ditirelo tša meetse
|
